Россия Ички ишлар ва Ташқи ишлар вазирликлари хорижда яшайдиган камида 500 минг россияликни ватанга қайтишга кўндириши зарур. Finanz нашрининг ёзишича, мамлакат ҳукумати ана шундай қарор қабул қилган.
Вазирликлар вакиллари чет элларга бориб, эмигрантларга Кўнгилли равишда кўчиш бўйича давлат дастури ҳақида гапириб беради. Ушбу дастур 2022 йилдан 2030 йилгача амал қилади. Ҳукумат амалдорларга минтақавий кўчиш лойиҳаларига асосланишни ҳамда лойиҳаларни амалга ошириш учун федерал бюджет маблағларидан фойдаланишни маслаҳат бермоқда.
Жаҳон банки маълумотига кўра, 2017 йилда Россиядан ташқарида яшайдиган фуқаролар сони 10,6 миллион эди, бу эса аҳолининг 7,4 фоизи демакдир. Кўчиб кетганлар сони бўйича Россия дунёда учинчи ўринда туради. Россияликларнинг 40 фоизи хорижга кўчишнинг асосий сабаби сифатида Россиядаги иқтисодий беқарорлик ва чет мамлакатларда турмуш тарзининг яхшироқ эканлигини тилга олган.
