Фейсбукнинг канадалик фойдаланувчилари Фаластиндаги охирги зўравонликлар ҳақидаги постлари йўқолиб қолгани ва ўчирилганидан шикоят қилгандан сўнг ижтимоий тармоқ маъмурияти мазкур ҳолат «техник носозлик» туфайли юзага келганини маълум қилди.
Компания ушбу ноқулайлик учун фойдаланувчилардан узр сўради.
«Дунё бўйлаб воқеаларга таъсир кўрсатадиган бу хато ҳеч қачон юз бермаслиги керак эди. Муҳим воқеаларга эътибор қарата олмадик деб ҳис қилган ва овозлари биз томонимиздан қасддан ўчирилди деб ўйлаган ҳар кимдан узр сўраймиз. Бундай ниятимиз йўқ эди. Биз муайян жамоа ёки уларни нуқтаи назарларини чеклашни хоҳламаймиз. Сиёсатимиз ҳар кимга сўз эркинлигини бериш учун ишлаб чиқилган ва ушбу сиёсатни ҳаммага бирдек қўллаймиз», – дейилади Фейсбукнинг баёнотида.
«Техник носозлик» исроилпараст нашрлар ва Яқин Шарқ бўйича бошқа контентларга таъсир кўрсатгани тўғрисида маълумот йўқ.
CBC телеканали мухбири билан суҳбатда Фаластин тарафдорлари ўзларининг ижтимоий тармоқлардаги постлари йўқолгани ва Фейсбук сўнгги зўравонликлар акс этган контентларни тўсиб қўйганини даъво қилишди.
