Ижтимоий тармоқларда Рамазоннинг охирги жумасида ўқиладиган махсус намоз ҳақида турли миш-мишлар тарқалди. Ўзбекистон мусулмонлари идораси Фатво ҳайъати бунга муносабат билдирди.

Тарқалган хабарда кимда қазо намозлари бўлса, Рамазоннинг охирги жума куни жума намози билан аср намози орасида 4 ракат намоз ўқиса, 400 йиллик қазо намозини ўқиган бўлиши айтилган.

«Аслида бу борада Расулуллоҳ саллаллоҳу алайҳи васалламдан нақл қилиб келтирилган ривоят тўқима бўлиб, уни тарқатиш, ривоят қилиш ёки унга амал қилиш мутлақо жоиз эмас. Фақатгина уни тўқима эканидан огоҳлантириш мақсадида нақл қилиш мумкин», — дейилади Фатво ҳайъати муносабатида.

Шунингдек, ушбу асоссиз ривоят ҳақида келиб тушган саволларга Ўзбекистон мусулмонлари идораси Фатво ҳайъати томонидан 2020 йили Рамазон ойида батафсил жавоб берилгани эслатиб ўтилган.

«Расулуллоҳ саллаллоҳу алайҳи васалламга нисбатан ҳадис тўқиш ёки ёлғон ривоятлигини билиб туриб, уни тарқатиш гуноҳи кабира саналади. Турли асоссиз маълумотларни тарқатишдан сақланайлик!», — деб таъкидлаган Ўзбекистон мусулмонлари идораси Фатво ҳайъати.

Аввалроқ, Рамазон кириши ҳақида хабар берганларга оид тўқима ҳадис ҳам инкор этилган эди.