Чеченистон парламенти аъзолари Инстаграм ижтимоий тармоғига бойкот эълон қилди.
Парламент сайтида айтилишича, депутатлар шу орқали спикер Магомед Даудовни қўллаб-қувватлашни ният қилишган. Даудов Инстаграмдаги саҳифасини ёпган ва “Чеченистон Республикаси раҳбари, Россия қаҳрамони Рамзан Қодировнинг саҳифасидан тўсиқ олиб ташланмагунига қадар” қайта очмаслигини билдирган.
Инстаграм ва Фейсбукдан Қодировнинг саҳифалари ғойиб бўлгач, у Инстаграмнинг чеченча варианти – Mylistory тармоғига ўтишини эълон қилди. Қодировнинг таъкидлашича, АҚШ Давлат департаменти ходимлари ушбу тармоққа Россия ташқи ишлар вазирлиги ва Чеченистон раҳбарияти рухсати билангина аъзо бўлиши мумкин.
Эслатиб ўтамиз, 20 декабрь куни Рамзан Қодиров АҚШнинг санкция рўйхатига тушган эди. АҚШ молия вазирлиги фикрича, Чеченистон президентининг ноқонуний судлаш, қийноқ ва инсон ҳуқуқлари бузилишларида қўли бор.
