Хориж сафаридан Британияга қайтган асли покистонлик оила мажбурий карантинда оғир кунларни бошидан кечиришига тўғри келди. ArabNews нашрининг ёзишича, карантинни меҳмонхонада ўтказган мусулмон оила меҳмонхона учун 4025 фунт стерлинг (5610 АҚШ доллари) тўлаган. Бироқ у ердаги шароитга чидаш қийин эди: ичимлик сувини соатлаб кутишга тўғри келди, устига-устак, уларга чўчқа гўштидан тайёрланган бургер олиб келишган. Бургердан бошқа таомлар эса эски, қаттиқ ва бемаза эди.
Оила бекаси Наҳида Хоннинг айтишича, карантин кунларида болаларга ёрма ва чипсдан бўлак егулик беришнинг иложи бўлмади. Қолаверса, меҳмонхона учун каттагина пул тўлаган оила атиги битта стул берилган. Адвокатлар карантин шароитини ноқонуний деб ҳисобламоқда, чунки ҳатто қамоқҳонадаги маҳкумлар ҳам динларининг талабига кўра овқатланиш ҳуқуқига эга.
Британияда коронавирусга қарши кураш доирасида 15 февралда кучга кирган қоидага кўра, «қизил рўйхат»даги мамлакатларда бўлиб қайтганлар 10 кун давомида каратинда бўлиши керак.
