Россия ҳарбийлари вақтинча жойлашган Озарбайжон ҳудудидаги ноқонуний арман қуролли отрядлари Озарбайжон армиясининг Агдам вилоятининг Алиагали қишлоғида жойлашган қисмларига қарата ўқ узган. Бу ҳақда Озарбайжон Мудофаа вазирлиги матбуот хизмати хабарида айтилмоқда.
Маълумотларга кўра, воқеа 6 июл, сешанба куни маҳаллий вақт билан соат 17:50 да содир бўлган. Отишма натижасида Озарбайжон қуролли кучларининг ҳарбий хизматчиси яраланган.
«Отишма натижасида йўлларни ободонлаштириш ишларида иштирок этган Озарбайжон армиясининг ҳарбий хизматчиси Дадашов Сакит Аҳлиман ўғли жароҳат олди. Ярадорга биринчи тиббий ёрдам кўрсатилди ва у ҳарбий касалхонага ётқизилди», - дейилади хабарда.
Матбуот хизмати ушбу ҳодисани ўрганиш учун минтақада жойлашган Россия контингенти қўмондонлиги ва Туркия-Россия қўшма кузатув марказига воқеа тўғрисида маълумот берилганлигини қўшимча қилган.
