Американинг CNN телекомпанияси бутун дунё истедодли ва иқтидорли ёшлари ҳақидаги янги “The Generation Next” лойиҳасини бошлади. Бу ҳақда CNN расмий саҳифасида маълумот берилди.

Эътиборли жиҳати мазкур лойиҳанинг биринчи дастурида Американинг Super Dispatch технологик компаниясида ишлайдиган ўзбекистонлик дастурчи қиз Дурдона Баҳронова меҳмон бўлди.

Асли бухоролик бўлган дастурчи илм олиш мақсадида Тошкентга келган. Дастлаб биологияга қизиққан Дурдонанинг айтишича, у дастурлаш соҳасига кириб келган дастлабки вақтларда бу соҳада ишлайдиган аёллар салмоғи жуда кам эди. Шу сабаб бироз умидсизликка тушган. Аммо у дастурлашнинг кучини англаб етганида, ортга йўл йўқ эканлигини тушунган ва бугунги кунда мазкур соҳада муваффақиятга эришди.

«Аёллар ҳаёт тарзидаги муаммоларни ҳал қилиш эркакларга қолиши керак эмас. Чунки улар ҳамма учун мўлжалланган маҳсулот яратишга ҳаракат қилишса-да, аёлларга тааллуқли масалаларда барибир аёл мутахассислар талаб этилади», – деган у.

Яъни бу гаплари билан у аёлларга мўлжалланган дастурларни тайёрлашда аёллар нуқтаи назаридан ёндашиш учун уларнинг ўзлари ана шу соҳада фаолият олиб боришлар кераклигига ишора қилган.