Бундан ташқари, Украинадаги болалар тўйиб овқатланмасликдан азият чекмоқда.

UNICEF раҳбари Мануел Фонтейн БМТ Хавфсизлик Кенгаши йиғилишида Украинадаги болаларнинг қарийб учдан икки қисми Россия босқини бошланганидан  аввал уйларини ташлаб кетганини маълум қилди.

Украинадан қайтган Фонтейннинг айтишича, 7,5 миллион украиналик боладан 4,8 миллиони қочқинга айланган. У 31 йиллик фаолияти давомида бундай ҳолатга дуч келмаганини таъкидлади.

БМТ 142 боланинг ўлимини тасдиқлади. Аммо бу якуний кўрсаткичдан йироқ экани ва у деярли муқаррар равишда ўсиб бориши таъкидланган. 

Хавфсизлик кенгаши йиғилишида Украина элчиси Сергей Кислица ҳам Россия 121 минг болани Украинадан олиб чиқиб кетгани ва уларни Россияда асраб олиш жараёнини соддалаштирувчи қонун тайёрланаётганини айтди. 

Фонтейн бу айбловнинг далилларини кўрмаганлигини, аммо текшириб кўришини айтди.

Шунингдек, йиғилишда 1 миллиондан ортиқ украиналик болалар тўйиб овқатланмасликдан азият чекаётгани айтилди.  

Мануел Фонтейннинг сўзларига кўра, Украинадаги уч миллиондан ортиқ боланинг деярли ярми зарур миқдорда озиқ-овқатсиз қолиб кетиш хавфи остида.

«Мариуполь ва Херсон каби шаҳарларда вазият бундан ҳам ёмонроқ, бу ерда болалар ва уларнинг оилалари ҳафталаб сувсиз ва канализациясиз, мунтазам озиқ-овқат ва тиббий ёрдамсиз яшамоқда», — дея қўшимча қилди у.