Франциялик ўқитувчи Самуэл Патининг ўлдирилишига бир ўқувчи қизнинг ёлғони туртки бергани маълум бўлди. 

“Евроньюс” хабарига кўра, ўқувчи қиз гўёки Самуэл Патининг дарсда Муҳаммад алайҳиссалом таҳқирлаб чизилган карикатураларни кўрсатишига қарши чиққанини, ўқитувчи эса уни дарсдан чиқариб юборганини айтган. Аниқланишича, у ўша дарсда умуман бўлмаган, бироқ бу ёлғон Абдуллоҳ Анзоровнинг эътиборидан четда қолмаган.  

Бу уйдирмани қизнинг отаси ижтимоий тармоқлар орқали тарқатган. Айни пайтда у айбланувчилардан бири сифатида тергов қилинмоқда. 

“Ўшанда у ёлғон гапирган, энди эса ҳақиқатни гапиряпти, – дейди ўқувчи қизнинг адвокати Мбеко Табула. – Жамоатчилик гап 13 яшар бола ҳақида бораётганини унутмаслиги керак. У бўлиб ўтган ишлардан қаттиқ афсусда. У янгитдан ҳаёт бошламоқчи. Қиз қотилни танимаган, у билан учрашмаган, ҳеч қачон мулоқотда бўлмаган”. 

Эслатиб ўтамиз, Самуэл Патини 2020 йилнинг 16 октябрида асли чеченистонлик 18 ёшли Абдуллоҳ Анзоров ўлдирган эди. Унинг ўзини эса полициялар отиб ўлдирган.