Аввалроқ Автомобил йўллари қўмитаси Мусулмонлар идорасига «Мирза Юсуф» жомеъ масжиди имом хатиби Саййид Раҳматуллоҳ Термизийдан шикоят қилгани ҳақида хабар берган эдик. Бу шикоятга жавобан Раҳматуллоҳ Термизий ҳам раддия билдирган. Ушбу раддияда жумладан шундай дейилган.
«Ҳеч ким имомнинг панду насиҳатини эшитиб, “мени гапирди бу”, дейишга ҳаққи йўқ. Буни ҳамма қабул қилган. Аммо давлатимизнинг туппа-тузук бир давлат қўмитаси, ташкилотининг раис муовини менинг устимдан диний идорага, муфтий ҳазратларига шикоят хати ёзибди».
Шунингдек, эътирозда йўлчилар ҳақида гапирилгани, бу гап ўттиз минг йўлчи ишчиларни ҳақорат қилди дегандек маънода экани айтилган. Лекин Раҳматуллоҳ Термизий у ерда ўттиз минг деган сўзни ҳам айтмагани, аксинча оддий ишчи ҳеч қачон коррупция қила олмаслиги, фақатгина улар куннинг иссиғида эрталабдан кечгача ишлаши, бу маърузада ҳаммани коррупцияга қарши туришга чақиргани борасида тўхталганини айтган.
«Ҳеч бир кишини назарда тутмаганмиз. Аммо бу «жаноб», исмини ҳам айтардим, аммо у «жаноб»нинг исмини Расулуллоҳнинг меҳробида айтишга лойиқ кўрмадим. У «жаноб» хатининг бошида «бизнинг соҳага қарши гапирувчиларга қарши фикр ёзиш бурчимиз» деяпти. Сенинг бурчинг йўлни сифатли қилиб қуриш. Танқидга жавоб бериш эмас. Ё сен танқид қилинмайдиган жанобмисан? Сўзининг сўнгида «бу имом домлалар панду насиҳат қилиши керак» деганлар. Биз нима қилдик?! Биз ҳам панду насиҳат қиляпмиз. Сен эса бизнинг насиҳатимизни шахсингга олсанг, бу сенинг масаланг», – дея куйиниб гапирган у.
Дарҳақиқат, Раҳматуллоҳ Термизий маърузасида манзил ёки исм айтмаган, аммо имомнинг таъбири билан айтганда, ўша «жаноб» домланинг исмини муфтий ҳазратларига тўлиқ ёзиб, юқоридан зарба бермоқчи бўлган. Гўёки домланинг идорадан ишдан олинишини ёки танбеҳ берилишини кутишган. Эҳтимол, Раҳматуллоҳ Термизийнинг тушунтириш хати ёзиб, «тавба қилдим, билмабман, кечиринглар» дейишини кутгандир...
«Бир ўйлаб кўринглар, биродарлар, менинг гапимни ўша «жаноб» ҳам эшитади. Албатта эшитади, балки эшитиб ҳам ўтиргандир. Бир ўйлаб кўрсин, агар бу одамнинг шу тушунчаси бўйича ишлайдиган бўлсак, имомлар ёки мен зино ҳақида, фоҳишалар ҳақида гапирсам, Қатортолдаги фоҳишалар муфтийга хат ёзса, ароқ ҳақида гапирсам катта-катта ароқчилар бор, ўшалар ўттиз-қирқ минг киши ишлайди деб муфтийга хат ёзса, ўғирлик ҳақида ёзсам, улар муфтийга хат ёзса, нима бўлади, нима қилиш керак унда? Буларни гапириш бизнинг вазифамиз-ку ахир! Биз гапирмасак, ким гапиради?
Бу нарса нимани кўрсатади? Бу нарса ўша «жаноб»нинг фаросати ўзига яраша эканлигини кўрсатади. Бу нарса шундай аҳамиятли ўринларда фаросатсиз одамлар ҳам ишлаётганлигини кўрсатади», – деган Раҳматуллоҳ Термизий.
Шунингдек, «ўша одам айнан порахўр эканлиги ёки порахўр бўла олмай алам қилиб юрганлигини кўрсатади», дейилади раддияда. Бундан ташқари, халқни инсофга чақириш имомларнинг бурчи эканлиги ҳам таъкидланган. Аризада «домла ўрганмасдан гапирибди, далил йўқ» деб ёзилган. Лекин шу шикоят аризасини ёзувчи оддий халқ яшаётган кўчалардан бир юрса, йўлларнинг нақадар хароб эканлигини биларди. Ҳар биримиз бу жараённи кўриб турибмиз. Халқнинг кўзи кўр эмас! Битта ўйилган жой ойлаб ётади, тўғрилаб қўйса бўлади-ку.
«Ҳаммани инсофга чақириб, ўша «жаноб»ни ҳам, у «жаноб»нинг «жаноби»ни ҳам, бошқасини ҳам инсофга чақираман», – деган Раҳматуллоҳ Термизий. Чунки бу имомларимизнинг вазифаси экани, уни ҳамма ўзига олаверса, иш юрмаслигини таъкидлаган.
«Айтганлари ҳақиқат бўлса, менинг ўзимга чиқиши керак эди, «домла, сиз бизни хафа қилдингиз», деб исботлаб берса, мен узр сўрайман, агар хафа қилган жойим бўлса. Идора орқали, раҳбарият орқали бизга зарба бермоқчи бўлганлиги, у одамнинг нақадар пасткаш эканлигини кўрсатади. Ё ёзувчилик қонида бор, ё ёзувчи бўлиши мумкин, ё ёзувчининг боласи бўлиши мумкин, бошқа нарса эмас! Тупа-тузук одам, шундай раҳбар лавозимида ўтирган одамнинг ёзган хатини ўқисангиз, ўзининг ёзган хати ўзига қарши жавоб беряпти. Аввало сенинг Мусулмонлар идорасига бундай хатни ёзишинга нима журъатинг бор, нима ҳаққинг бор? Булар ўзининг вазифасини қиляпти.
Масалага иккинчи томонидан қарайдиган бўлсак, нима қилибди улар танқид қилинса? Ҳамма танқид қилинади, биз кўп танқид қилинамиз. Ёки баъзан емаган сомсамизга пул тўлаймиз. Имомлар «Муаллими соний» ўқитгани учун жиноий жавобгарликка тортилиб турса, сен йўлни бузуқ қурганинг учун, давлат бюджетидан ҳақ олганинг учун танқид қилинсанг бўлмайдими? Имомлар «Муаллими соний» ўқитгани учун гуноҳкор бўлса майлию, бу «жаноб» айбига яраша танқид қилинишига чидай олмаяптилар. Қани бунда мантиқ?..» – дейилади Термизийнинг мурожаатида.
Ҳақиқатан ҳам, бизда доим шундай, катта жиноятлар бир четда қолиб кичик жиноятларга бор кучимизни сарфлаймиз.
Айни дамда ижтимоий тармоқларда Саййид Раҳматуллоҳ Термизий фикрлари ва Автомобил йўллари қўмитаси шикоят аризаси кенг муҳокамаларга сабаб бўлмоқда.
