АҚШ Мудофаа вазири Ллойд Остин Донбассдаги уруш учун Россия айбдор эканлигини айтди. У Москвани зудлик билан Украина шарқидан қўшинларини олиб чиқишга чақирди. 

“Келинглар, аниқ гапирамиз, бу урушни Россия бошлади ва тинчлик музокараларига тўсқинлик қилаётган ҳам айнан Россиядир. Улар Украинанинг ҳудудий яхлитлиги ва суверенитетини буза бошлашди”, – деди Остин Киевда украиналик ҳамкасби Андрей Таран билан бирга ўтказилган матбуот анжуманида. 

Шунингдек, Пентагон раҳбари Қримнинг Россияга қўшиб олинганини қоралаб, Россияни Украина шарқидаги урушни, Қора денгиздаги ва Украина чегаралари бўйлаб беқарорликни тўхтатишга чақирди. 

Остин Украинанинг НАТОга аъзо бўлиши ҳақида гапирар экан, бу борадаги қарорни Украинанинг ўзи қабул қилишини билдирди. 

АҚШ Мудофаа вазири Ллойд Остин кеча, 19 октябрь куни Украина президенти Владимир Зеленский билан ҳам учрашди.