Жорий йилнинг 8-9 сентябрь кунлари Қозоғистон пойтахти Нур-Султонда Озиқ-овқат хавфсизлиги бўйича Ислом ташкилоти Бош ассамблеясининг тўртинчи сессияси бўлиб ўтади.

Тадбир «Пандемиядан кейинги дунёда Ислом ҳамкорлик ташкилотининг озиқ-овқат тизимлари» мавзусида онлайн форматида ташкил этилади. Кун тартибига Озиқ-овқат хавфсизлиги бўйича Ислом ташкилотига янги давлатларнинг қўшилиши, 2020 йил молиявий ҳисоботини тасдиқлаш, илгари қабул қилинган стратегик дастурлар ва Бош ассамблеянинг 2-3 резолюцияларини бажариш, шунингдек, институционал ва маъмурий масалалар киритилган. Ташкилотнинг 2031 йилгача бўлган 10 йиллик стратегияси ҳам тақдим этилади ва муҳокама қилинади.

Ислом ҳамкорлик ташкилоти доирасида Озиқ-овқат хавфсизлиги бўйича Ислом ташкилотини тузиш ташаббусини 2011 йилда Қозоғистоннинг биринчи президенти Нурсултон Назарбоев кўтарган. Ташкилотнинг бош қароргоҳи Нур-Султон шаҳрида жойлашган, Бош ассамблеясининг илк сессияси 2016 йилнинг апрелида бўлиб ўтган.