Ижтимоий тармоқларда ўқитувчилар мактабда ўзининг мажбуриятлари билан боғлиқ фаолиятни давом эттираётганига қарамай, мактабларда иситиш тизими ўчириб қўйилгани тўғрисидаги хабарлар тарқалди. Халқ таълими вазирлиги мазкур ҳолатга ўз муносабатини билдирди.

Халқ таълими вазири ўринбосари Иброҳим Жўраев мактабларда иссиқлик таъминотини узлуксизлигини таъминлаш юзасидан ZOOM платформаси орқали ҳудудлардаги масъуллар билан видеоконференция орқали тезкор йиғилиш ўтказгани маълум қилинди. Вазир ўринбосари мактабларда иш фаолиятини амалга ошираётган ўқитувчиларга зарур шарт-шароитларни яратиш чораларини кўриш бўйича кўрсатма берган.

Хусусан, барча мактаблар куз-қиш мавсумига тайёрлиги, синф хоналарини иситишга барча зарур воситалар мавжудлиги боис мактабларда иситиш тизимини узлуксизлигини таъминлашга вилоят бошқарма бошлиқларига шахсан масъул эканликлари қайд этилган.