Нигерия ғарбидаги Нигер штатида жойлашган Тегина шаҳрида бир гуруҳ қуролланган шахс мактаб-интернатга бостириб кирган ва 200 нафарга яқин ўқувчини ўғирлаб кетган. Маҳаллий Vanguard нашрининг хабар беришича, ҳодиса кеча, куннинг иккинчи ярмида содир бўлди.
Штат расмийлари ўқувчиларнинг ўғирланганини тасдиқлаган бўлса-да, уларнинг аниқ сонини айтишни истамаган.
Нигерияда сўнгги ойларда олий таълим муассасалари ва мактабларга ҳужумлар кўпайди. Маълумотларга қараганда, жорий йил бошидан бери мамлакатнинг турли ҳудудларидаги олий таълим даргоҳлари ва мактаблардан 700 дан зиёд талаба-ўқувчи ўғирлаб кетилган.
Нигериянинг шимолида маҳаллий ҳукуматнинг қарори билан март ойидан бери 600 дан ортиқ мактаб ёпилди. У ердаги ўқувчилар хавфсизроқ ҳудудлардаги мактабларга ўтказилди. Шу билан бир қаторда ишлаб турган таълим муассасаларида хавфсизлик чоралари кучайтирилди.
