Нигерияда жорий йилнинг январь-август ойларида минг нафардан ортиқ ўқувчи-талаба ўғрилаб кетилган. Болалар ҳимояси билан шуғулланувчи Save the Children ташкилотининг маълумотига кўра, ўғирланган болаларнинг аксари ҳалигача топилгани йўқ.

Қайд этилишича, 2020-2021 йилларда Нигерия мактабларига ҳужумлар ортди, оқибатда кўпгина мактабларни ёпишга тўғри келди, мамлакат таълим тизими ўта хавфли вазиятга тушиб қолди.

«Таълим масканларига ҳужумларни бутун бошли авлодга ҳужум сифатида баҳолаш мумкин», – дейди Save the Children ташкилотининг Нигериядани вакили Мерси Гичухи.

Унинг айтишича, бундай ҳужумлар туфайли болалар мактабда ўқишдан воз кечяпти.

Сўнгги ойларда ўқувчиларнинг ўғирланиши билан боғлиқ ҳолатлар Нигериянинг Бенуэ, Кадуна, Плато, Катсина ва Замфара штатларида кузатилган. Ўқувчиларни ўғирлаб кетган қуролли гуруҳлар кўпинча улар учун товон талаб қилади.