Нигериянинг Тегина шаҳрида (Нигер штати) жойлашган “Салиҳу Танко” мадрасасидан олиб қочилган талабаларнинг сони 136 нафар эканлиги маълум қилинди, дея хабар бермоқда “Евроньюс”.

Федерал ҳукумат 30 май куни олиб қочилган талабаларнинг сони 200 атрофида эканлигини айтган эди. Ўғирланган талабаларнинг оилалари билан алоқа ўрнатилгач, уларнинг аниқ сони маълум бўлди.

“Салиҳу Танко” мадрасаси директори Абубакар Алҳасаннинг сўзларига кўра, талабаларни ўғирлаган қуролли гуруҳ вакиллари унга қўнғироқ қилган ва 110 миллион найра (тахминан 268 минг АҚШ доллари) тўланишини талаб қилган. Улар агар пул тўланмаса, илми толиблар ўлдирилишини айтиб таҳдид қилган.

Алҳасан жиноятчиларнинг талабини штат ҳукуматига етказган, бироқ ҳукумат талабаларнинг озод этилиши учун пул тўлаш ниятида эмас.