Айни пайтда Россиянинг Покров шаҳридаги ахлоқ тузатиш колониясида сақланаётган мухолифатчи Алексей Навалний унга Қуръон берилмагани учун судга мурожаат қилмоқчи.

“Мени қамашганида мен қамоқхонада амалга оширишга уринадиган ва мени яхшилайдиган нарсаларнинг рўйхатини туздим. Улардан бири Қуръон ва суннатни чуқур ўрганиш”, – деб ёзди Навалний Инстаграмдаги саҳифасида. У россиялик номусулмон сиёсатчилар орасида “Қуръон чемпиони” бўлмоқчи эканлигини маълум қилди.

Мухолифатчининг айтишича, унга ўзи билан олиб келган ва буюртма қилган китобларидан ҳеч бири берилмаган, чунки уларни “экстремизмга текшириш” керак. Колония раҳбарияти эса бу уч ой вақт олишини айтган.

“Колониямни Қуръон туфайли судга беришимни ким ҳам ўйлаб дейсиз. Ҳа, ҳа. Шифокор билан учрашишнинг рад этилиши, сақлаш шароитлари туфайли эмас, балки мусулмонларнинг муқаддас китоби туфайли. Гап шундаки, менга менинг Қуръонимни беришмаяпти”, – деди Навалний.