Президент сайловида қатнашишни режалаштираётган франциялик ёзувчи Эрик Земмур мамлакатда мусулмонча исмларни тақиқлаш таклифи билан чиқди. ArabNews хабарида айтилишича, у аввалроқ иммиграцияни чеклаш ҳамда Франциядаги мусулмонларни француз маданияти ва анъаналарига риоя қилишга мажбурлаш ҳақида фикр билдирган эди. 

Яқинда Земмурнинг “Франция охирги сўзини ҳали айтгани йўқ” номли китоби нашрдан чиқади. Унинг айтишича, агар президент этиб сайланадиган бўлса, болаларга насронийча ёхуд қадимги тарихга хос исмлар қўйишни кўзда тутувчи Наполеон Бонапарт қабул қилган ва 1993 йилда Франсуа Миттеран бекор қилган қонунни тиклайди. 

«Мен 1803 йилдаги қонунни тиклайман. Французлар ўғлига Муҳаммад деб исм қўя олмайди. Менимча, биз француз миллатини қайтадан шакллантиришимиз зарур. Муҳожирларнинг олдинги авлоди исмларимизни ўзгартириб юборди. Уч авлод ўтгандан кейин ҳам муҳожирлар ўғлига Муҳаммад деб исм қўяётганидан хафаман», – деди исломофоб ёзувчи.