Европарламентда Россияга қарши резолюция бўйича 569 депутатдан 67 нафари қарши овоз берди, 46 нафари бетараф бўлди. Deutsche Welle хабарига кўра, қолган депутатлар резолюцияни қўллаб-қувватлади.
Ҳужжатда Россиянинг яқинда Украина билан чегарага қўшин йиққани ва Қримни босиб олганига эътибор қаратилган ҳамда Москванинг ушбу ҳаракатлари “таҳдидкор ва беқарорлаштирувчи” деб аталган. Депутатларнинг фикрича, дўст давлатлар Украинага ҳарбий ёрдамни ошириши зарур.
Европа парламенти агарда Россия Украина ҳудудига бостириб кирса, унга нисбатан бир қатор жазо чораларини қўллашни таклиф қилди. Хусусан, Россия SWIFT халқаро тўлов тизимидан узилади, Россиядан Европага нефт ва газ импорти зудлик билан қисқартирилади. Шунингдек, резолюцияда Россия ҳукуматига яқин барча олигархлар ва уларнинг оила аъзоларининг активларини музлатиш кўзда тутилган.
Резолюцияда россиялик мухолифатчи Алексей Навальний масаласига ҳамда Чехиянинг Россия билан дипломатик можаросига тўхтаб ўтилган.
