Аввал қудуққа, сўнгра зиндонга ташланган Юсуф алайҳиссаломни ўша пайтда подшоҳ бўлишлари кимнинг ақлига сиғар эди?!

Кечаси қоронғуда Абу Бакр розияллоҳу анҳу ҳамроҳлигида Маккадан яширинча чиқиб кетган Набий алайҳиссалом куни келиб Маккага кундузи фотиҳ ўлароқ кириб келишлари кимнинг хаёлига келган эди?!

Билол розияллоҳу анҳу куни келиб у зотни арзимаган пулга сотиб олган ва сотган, у зотга анвойи азоблар берган ўз хўжайини мушрик Умайя ибн Халафни ўлдиради деса ким ишонар эди?!

Абдуллоҳ ибн Масъуд розияллоҳу анҳу куни келиб Макканинг катталаридан бири Абу Жаҳл ибн Ҳишомни ўлдиради деса ким тасдиқ қилар эди?!

Руминиянинг мустабид президенти Чаушевски куни келиб кўчаларда судралади деса, ҳеч ким ишонмас эди.

Италиянинг диктатори Муссолини куни келиб дорга осилади деса, ҳеч ким ишонмас эди.

Демак, кунлар Аллоҳнинг лашкари. Улар билан кимнидир кўтаради, кимнидир ерга уради!

Абдулқодир Полвонов