Россиялик сенатор Владимир Жабаров Москванинг “Толибон” ҳаракати билан алоқаларини ўрнатиши мумкинлигини тахмин қилмоқда.

«Биз ҳар қандай қонуний ҳукумат [Афғонистон] билан ҳамкорлик қиламиз. Агар толиблар қонуний ҳукумат бўлса, албатта, бизнинг мамлакатимизга душман бўлмаслик шарти билан муносабатларни яхшилаймиз», - дейди сиёсатчи.

Илгари ҳам Россия Федерацияси ва Толибон билан музокаралар бўлган, аммо улар ривожланмаган, деб эслаган Жабаров:

"Шу билан бирга, биз уларга америкаликлар сингари очиқчасига салбий муносабатда бўлмаганмиз. Умид қиламанки, бу муносабатлар нормаллашади".

Сенаторнинг сўзларига кўра, ягона муаммо – толибларнинг америкаликлар билан ҳамкорлик қилган ўз фуқароларини қатл этишидир.

«Бундай қилиш мумкин эмас, албатта. Менимча, бу бутун халқаро ҳамжамият томонидан қораланади. Умид қиламанки, соғлом фикр ғалаба қозонади", деган Жабаров.

Сал илгарироқ хабар берганимиздек, шайх Шаҳобуддин Деловар бошчилигидаги “Толибон” делегацияси ҳозирда Москвада ва Россия президентининг Афғонистон бўйича махсус вакили Замир Кобулов билан маслаҳатлашувлар ўтказган.

2003 йилдан бери Россияда "Толибон" террористик ташкилот сифатида тан олинган ва унинг фаолияти тақиқланган бўлса-да, ушбу ҳаракат вакиллари 2018 йилдан бери Афғонистондаги можарони ҳал қилиш бўйича Москвада бўлиб ўтган музокараларда қатнашиб келган. Охирги марта толиблар Москвага кенгайтирилган "учлик" (РФ, АҚШ, Хитой, Покистон) йиғилишида қатнашиш учун март ойида келган.